Upphitun: Akureyri - FH

Akureyri Handboltafélag fær FH í heimsókn í 10.umferð Olís-deildarinnar næstkomandi sunnudag, 25.nóvember klukkan 16:00 en húsið opnar klukkutíma fyrr þar sem hægt verður að fá hamborgara og drykk gegn vægu gjaldi.

FH er í 3.sæti deildarinnar með 13 stig eftir níu leiki, stigi á eftir toppliði Hauka. FH hefur unnið 5 leiki (Fram, Gróttu, Stjörnuna, ÍR og ÍBV) gert þrjú jafntefli (Val, Aftureldingu og Haukar) og tapað einum leik gegn Selfossi.

Okkar fyrrum leikmaður, Ásbjörn Friðriksson, hefur verið allt í öllu í sóknarleik FH í vetur en hann er markahæsti leikmaður liðsins með 69 mörk í fyrstu níu leikjunum. Hann mun þó ekki vera með liðinu á sunnudag þar sem hann tekur út leikbann.

Ási hefur leikið 50 leiki fyrir Akureyri Handboltafélag í efstu deild og skoraði hann 131 mark í þeim á árunum 2006-2008.

Næstmarkahæsti leikmaður FH í vetur er hægri hornamaðurinn Birgir Már Birgisson sem hefur skorað 41 mark. Annar lykilmaður í leik FH er línumaðurinn stóri og stæðilegi Ágúst Birgisson sem lék sína fyrstu A-landsleiki á dögunum. Þjálfari FH er Akureyringurinn Halldór Jóhann Sigfússon sem gerði garðinn frægan með KA á árum áður og honum til aðstoðar er fyrrum landsliðsmarkvörðurinn Roland Eradze.

Við hvetjum alla Akureyringa og nærsveitunga til að fjölmenna í Höllina á sunnudag og styðja okkar menn til sigurs. Fyrir þá sem ekki komast verður leikurinn sýndur beint á rás Akureyri Handboltafélag á Youtube.

Áfram Akureyri!


Athugasemdir

Sparaðu um leið og þú styrkir strákana okkar

  • Orkan og Orkulykill

    Orkan og Orkulykill

    Fáðu 10 krónu afslátt á lítrann um leið og þú styrkir Akureyri Handboltafélag með Orkulyklinum!

    Lesa meira